Innholdsfortegnelse for 2023-04-09 i Isolezwe nGesonto Sunday

YEHHENI webantu! Saze savelelwa yizangoma zezinsuku zokugcina. Mhlola muni lona ogilwa yimiphuphe yezangoma uMakgotso "Gogo Maweni" Makopo, noPatricia "Gogo Skhotheni" Motsoeneng? Kuyanyanyisa ukubona izalukazi ziklwebhana okwamakati ezinkundleni zokuxhumana. Ngazi ukuthi izangoma zangempela azilokhu ziklwebhana, zisabisana kodwa zigadla ngezulu. Ezidla imbumba zibonakala ngokusabisana. Isangoma sangempela asibuzi nokuthi usibanibani uhlala kuphi. Buka sinenqwaba yezangoma kodwa kasazi ukuthi ngubani owabulala uSenzo Meyiwa no-AKA? Bhulani phela nisitshele ukuthi ukuphi nje uThabo Bester.…

BATUSE amagalelo kaMbalehle “Hlomu” Mavimbela, emva kokuphela kwesizini yesithathu ye-The Wife. Abalingisi balo mdlalo, bayishayele ihlombe le ntokazi edabuka eLadysmith, ngamagalelo nokuzimisela kwayo, kusukela uqala umdlalo. UWiseman Mncube obedlala indawo yokuba wumyeni kaHlomu, uMqhele Zulu, uthe kube yisibusiso ukulingisa nalo mlingisi. “UMbali unethalente elimangazayo. Kube yintokozo ukusebenza naye. Ungumuntu ozinikelayo emsebenzini wakhe, unothando nenhlonipho. Ngibonga nokungamukela kwakhe ngezandla ezifudumele. Ngimfisela okuhle kodwa,” kusho uWiseman. UMondli Makhoba obedlala indawo kabhuti omdala, uNkosana Zulu, naye akasalanga ngaphandle kwabatusa le ntokazi, njengoba echaze uMbali njengomlingisi onobuhlakani. “Ukulingisa naye kwenza uvuseleleke, futhi uhlezi engumuntu ozilungiselele. Noma yini edingwa indawo ayidlalayo uyenza ngokuzimisela. Ungumuntu oyaziyo indawo yakhe emdlalweni futhi ugqama aphinde alekelele ngesikhathi esifanele. Okuyinto ehlula abalingisi abaningi”, kusho uMakhoba. UMbali uthe ubengeke alingise indawo kaHlomu ngempumelelo eyedwa, konke abeyikho kulo mdlalo kungenxa yokwesekwa…

Ngokwesitatimende esithunyelelwe abezindaba, iKuRuff wuhlelo oluzoqala ukukhonjiswa kuShowmax ngoLwezibili kusukela ngo-Ephreli 17. Bathe luzobe lugxile kakhulu kubantu abathwala izindleko emakhaya, okuyibo abondlayo futhi babuye bafundise izingane, okubizwa ngentela ekhokhwa ngumuntu omnyama (black tax). UWright uzobonakala ekhulumisana nababhekene nalowo mthwalo nalabo abaphenduke izimbungulu ezincela igazi lakhe bese kuqhanyukwa nesisombululo ekuxazululeni le nkinga. UWright uthe awukho umthetho obekelwe ukuxazulula i-black tax nokuthi kungabhekwana kanjani nayo. "Kubi. IKuRuff imayelana nokuguqula impilo yabantu ngendlela enhle yokuba kuxoxiswane, okuyinto esingavamisile ukuyenza njengabantu abamnyama." Uthe uyayazi i-black tax, yize ayengayikhokhi kubantu bakubo ngqo kodwa wayencelwa igazi yizihlobo engazi. "Emndenini wami besihlale sizama ukukhuphulana futhi siqinisekisa ukuthi wonke umuntu uyaphumelela. Kwesinye isikhathi kuyenzeka kube khona ozithola esethwele umndeni. Lokhu sengikubona manje sengimdala." Uthe akukhona ukuxhashazwa ngemali kuphela kodwa nangokwengqondo kuyamkhahlameza umuntu. "Ngibabonile abantu abaningi njengoba sengisebenza…

UMCULO kamaskandi nowombhaqanga ngeke uphinde ufane nakuqala kulandela ukudlula emhlabeni kwengwazi yomdlali wesigingci sebhesi u-Aaron "Maqhude" Mkhize, obedume ngeleNdlala Beyiduda Beyithengel' Amasaka, Usoka Lentombi Beyilaph' Endlini. La mazwi angasenhla ashiwo yinkakha yomculo we-Afro Jazz kodwa esiyikhansela le-DA eKurhuleni, uBongani Nkwanyana, eqinisekisa ukushona kukaMaqhude (63) izolo. "Ngaqala ukuhlangana nalo mngani wami omkhulu ngo-1986 emigwaqweni yaKwaMashu futhi sakhula ndawonye," kusho uBongani ocule neBig NUZ engomeni ethi Ntombenhle noThandiswa Mazwai kwethi Ucijimpi. UShwi Mantombazane uthe uphatheke kabuhlungu ngoMaqhude ngoba ubesiqongqotha isigingci sebhesi ezingomeni zakhe nakwezabanye abaculi. UKhuzani uthe kubuhlungu futhi akukholakali, maqede wafaka i-video enoMaqhude e-studio. Abafana BakaMgqumeni bathe ngeke bangakhali ngoba balahlekelwe kakhulu ngoMaqhude. Leli ciko laKwaMaphumulo, e-KZN, liqale ukungena liphuma ezibhedlela emuva kokuhlaselwa yisifo sohlangothi ngo-2020 kangangoba ligcine lingasakwazi ukukhuluma kahle nokuzenzela izinto. Umkakhe, uMariah, wadalula ukuthi isifo sohlangothi samhlasela…

USEYIMENENJA yoMnyango wezobuCiko, amaSiko nokugcinwa kwamaGugu kuMasipala iKing Cetshwayo, eRichards Bay, uMntwana uThulani kaGqikazi, obekhulumela indlunkulu kaZulu. UMntwana uThulani wasendlunkulu kaZulu, ungowendlu yaseZibindini kanti usondelene neSilo uMisuzulu kaZwelithini. Usebenze kakhulu neSilo esidala uZwelithini kaBhekuzulu, kanti wayeqale umsebenzi ngo-2012, ephethe izindaba zokuxhumana. UMntwana uThulani wesule esikhundleni sokukhulumela indlunkulu ngonyaka odlule wathi ubona sengathi usesebenzile ucela ukushenxa. Isolezwe ngeSonto lihoshe ukuthi usekuMasipala, iKing Cetshwayo. UMntwana uThulani usanda kubonakala ehleli nezikhulu komunye umcimbi kamasipala iKing Cetshwayo, obuseRichards Bay. Umkhandlu iKing Cetshwayo ubuswa yi-IFP ewuhlwithe ezandleni ze-ANC, ngesikhathi kunokhetho lohulumeni basekhaya. Ebuzwa ngalokhu uMntwana uThulani ukuqinisekisile ukuthi uphethe ezamasiko wathi yinto ayiqondisisa kahle ngoba ungowasendlunkulu. “Yebo kunjalo kodwa angisona isikhulu ngiyiMenenja yezobuCiko, amaSiko nokugcinwa kwamagugu. Wumsebenzi ongenawo umehluko ongako futhi angiqhelile endlunkulu ngiyasebenza neNgonyama uma ingidinga, ngiyatholakala,’’ kuchaza uMntwana uThulani. Isikhundla sokukhulumela indlunkulu…

ASHIYE angalazi amaqembu aphikisayo ebhekise kuhulumeni wezwe emuva kwemibiko ethi isicelo sokubuyisa umndeni wakwaGupta kuleli, sichithiwe. Umsindo usuke ngesikhathi uNgqongqoshe wezoBulungiswa uMnuz Ronald Lamola, ememezela ukuthi isicelo sichithiwe kodwa bazama ukudlulisa isinqumo sezinkantolo zase-United Arab Emirates (UAE). INingizimu Afrika yafaka isicelo sokuthi izelamani zakwaGutpa, u-Atul noRajes, zibuyiswe zizobhekana namacala enkohlakalo kuleli. Izelamani zisolwa ngokuba ngobhongoza bezenzo zenkohlakalo ezinkampanini zombuso wezwe. AbakwaGupta bangabangani bowayengumengameli uMnuz Jacob Zuma, okusolwa ukuthi basebenzisa lokho ukuzitapela emalini yezwe. Ikhomishini ebiphenya ngokulawulwa kombuso yidlanzana ibakhombe ngenjumbane abakwaGupta, ngezenzo zenkohlakalo kuleli. Muva nje, kunemibiko yabezindaba ethi abakwaGupta babonakale bezipholele eSwitzerland, ekubeni befunwa uthuli kuleli. I-DA ithe okuxakayo wukuthi udaba lokubuyiswa kwabakwaGupta lwalalelwa enkantolo ngoFebhuwari 13, kwaphuma isinqumo kodwa bekuthulekile sonke lesi sikhathi. Ibuza ukuthi yini ebiyenziwa sonke lesi sikhathi udaba…

UKUZIDLELA amahlanga kweMamelodi Sundowns, ngokuthatha isicoco seDStv Premiership ekubeni isasalelwe yimidlalo eyisikhombisa kuqongise ingcindezi kwiKaizer Chiefs ne-Orlando Pirates. Womabili amaqembu anenselelo yokuvikela isithunzi, okungenani ngokuqeda ezindaweni eziwafaka emiqhudelwaneni yeConfederation of African Football (Caf). ISundowns inqobe isicoco sesithupha seligi kulandelana ingekho ngisho enkundleni ngempelasonto edlule ngenxa yokuthi ibisonga imidlalo yamaqoqo eCaf Champions League. Namuhla ngo-3 ntambama iSundowns idlala neSwallows FC koweligi eDobsonville Stadium, eSoweto. Kuzo zonke izimbangi zeSundowns kwiPSL, yiChiefs nePirates abanenselelo enkulu yokuqeda ukubusa kwayo ngenxa yezithunzi zalawa maqembu amakhulu eNingizimu Afrika. IPirates ibidlala neChippa United izolo kanti iChiefs ibibhekene neMarumo Gallants. Womabili amaqembu aseSoweto, angene kule mpelasonto eyibambe emaphuzwini angu-40 ngokwehlukana yize kuyiPirates ebingenhla ngenxa yesimo esihle samagoli. Ukwehluleka kwabo ukuqeda ezindaweni ezibafaka emiqhudelwaneni yeCaf kuzoba nomthelela omubi ekutheni bangene kwi-Africa Super League, eqala ngo-Agasti. Phambilini kubikwe ukuthi izobunjwa…

NGICELA ningihalalisele bakwethu ngokumenywa emicimbini esezingeni elicokeme kulezi zinsuku. Bengincokola nosaziwayo bangempela emcimbini wabaphisi bakagologo iMartell, eGoli. Ngikhathele ukuvika uquqaba oluwuvanzi eThekwini, engingeke ngiludalule ngoba lunodlame. Nani niyalwazi lolu vucu olungaqashwa nanguKing Bhaka, uma enzele abantwana iladi. Emcimbini ngizithele kuNomalanga Shozi, wasePort Shepstone. Ngisho lona obesakaza kwiGagasi FM. Ubelokhu ecefezela nanoma ngubani obegqashukelwe wulayini ukuthi usehlukene newele leMajor League DJs, uBandile Mbere. Abangasamkhumbuli uBandile, yilo owashaya uJimmy Tau ngemva kwendlebe ngengoduso yakhe, maqede bachitheka bugayiwe. Yize waphika kodwa ayinuki ingosiwe. Kuhle ngoba ngamazisa uNomalanga ngaleli soka lamanyala. Angithi selibuya nakumrepha ka-AKA, uNadia Nakai. Kungenzeka yini amanzi aphinde ame lapho ake ama khona noma sekwakhiwa indlu yomxhaso?…

Kulo mcimbi kuzobe kushiyelana inkundla osomahlaya abahlonishwayo kuleli okubalwa kubo uTrevor Gumbi, Siya Seya, Flymotion noGqonqa kanti uhlelo luzobe luphethwe umgqugquzeli, uPhilani Charles Mthethwa. Lezi zintandokazi zizobe zibhulelwa amazolo ngoMonde Blose, Lunga Mjelo, Anele Mgewu noSandile Gumede. UPhilani ubuye wadalula ukuthi kunenduku ayifihle emqubeni, okungusomahlaya oseke wahlabana kwiDStv Viewers' Choice Awards. Uthe lomcimbi uzobe usezingeni lwemicimbi yezindondo njengoba izethameli nosomahlaya bazobe begqoke beconsa futhi behamba kukhaphethi obomvu. Uthe izethameli zizokhokha uR3 500 kubandakanya amathikithi amabili okubukela umcimbi, isidlo sakusihlwa sababili nesasekuseni nokulala endaweni eyi-4 Star. "Inhloso ngqangi ngalo mcimbi ukwenza abantu baseNingizimu Afrika bathathe umkhakha wamahlaya njengomsebenzi obalulekile endimeni yezokungcebeleka," kusho uPhilani. Ugcizelele ukuthi izethameli ziswenke ngempela ngoba ufuna lomcimbi ube sezingeni elicokeme ngenxa yengqephu. Amathikithi azoqala ukudayiswa kusukela ngo-Ephreli 15 ukugwema isiminyaminya ngosuku lomcimbi. "Okunye okumnandi wukuthi ngosuku lomcimbi…

BAMCHITHILE nezipho zakhe kwaba muncu uMnuz Malesela Teffo, obehlela ukuyobona umndeni wakwaMeyiwa ewuphathele ‘izipho zePhasika’. UTeffo ubengummeli wabamangalelwa abahlanu abashushiswa ngecala lokubulawa kukaSenzo Meyiwa, owayengunozinti weBafana Bafana ne-Orlando Pirates. UMeyiwa wadutshulwa wabulawa ngo- 2014, ekubo kwentombi yakhe engumculi uKelly Khumalo. Icala lokubulawa kwakhe liphambi kwezithebe zenkantolo lapho kushishiswa abalisa okuthiwa bambulala. UTeffo wayengummeli kodwa wahoxa ecaleni futhi enye inkantolo yakhipha isinqumo sokumsusa ohlwini lwabameli. Isolezwe ngeSonto lihoshe ngomthombo walo ukuthi uTeffo ushayele abakwaMeyiwa ucingo ethi uzofika ezobabona ngoLwesine, lwesonto eliphelayo. Kuthiwa uthembise ukuthi uzofika eqiqinge ‘izipho zePhasika’ ezobabona. Kuthiwa unina kaSenzo, uthinte abe-Afriforum ebazisa ngalokhu. Bakhuza, babaza babhalela uTeffo incwadi evuthayo. I-Afriforum yiyona emele abakwaMeyiwa njengoba kuqhubeka icala iyabeluleka ngezomthetho. Isolezwe ngeSonto liyibonile incwadi ye-Afriforum ebhekiswe kuTeffo imazisa ukuthi unina kaSenzo ngeke akwazi ukubonana naye futhi ngeke amukele lutho oluvela…

LIYAQHUBEKA ishobolo lokuba yithofi kweRichards Bay FC ngemva kokushawa yiLamontville Golden Arrows ngo 1-0 emdlalweni womkhaya baKwaZulu-Natal weDStv Premiership, izolo ntambama eKing Zwelithini Stadium, eMlaza. IBay esiphenduke umtapo wamaphuzu emaqenjini ePremiership, ibishawa okwesikhombisa imidlalo yeligi ilandelana. Ukuboza kwayo kubukeka kubeka engcupheni umsebenzi wabaqeqeshi beqembu eliholwa nguVasili Manousakis, njengoba iqhubeka nokulahla amaphuzu budedengu. IGolden Arrows isheshe yacacisa ukuthi ifuna ukuwunqoba umdlalo ngoba kuthe zibekwa nje ebhandeni ngomzuzu wesihlanu uqalile, uRyan Moon wangqomfela phakathi ngekhanda ibhola ebeligotshwe nguKnox Mutizwa, obekukade kuyi-corner kick. Luphinde lwanda usizi lweRichards Bay ngenkathi injini yasesiswini u-Abel Mabaso, ikhishwa ngekhadi elibomvu ngomzuzu ka-37 ngemva kokudlalisa kabi uMoon kanti ubesebhalwa okwesibili. Lokhu kuholele ekutheni iqembu lidlale ingxenye yomdlalo selixhuga. Kepha, akugqamanga ukuthi liyashoda ngoba belingaphezudlwana ngomdlalo, lithola amathuba okufika emapalini kodwa kwale ukwenza. Ukunqoba kwaBafana Bes’thende umdlalo, kusho ukuthi…

KUSHUBISA umbango wesicoco seMotsepe Foundation Championship, ukunqoba kweCape Town ngokubhaxabula izimbangi zayo iCasric Stars ngo-2-0 ngoLwesihlanu ntambama, e-Athlone Stadium, eKapa. Amagoli enqobe ngawo iSpurs avalelwe phakathi nguTherlo Moosa ngesiwombe sokuqala, elesibili lashaywa nguBoitumelo Radiopane ngesiwombe sesibili esuka ebhentshini. Ukunqoba kweSpurs emdlalweni obubhekwe ngabomvu kusho ukubuyela kwayo umgqigqo nokuba sembangweni weligi njengoba ifike emdlalweni ibuya esibhaxwini semidlalo emibili ilandelana. Ngakolunye uhlangothi ukwehlulwa kweStars kusho ukwehla esicongweni ngoba bekuyiwe kulo mdlalo ihlezi phezulu kwi-log yeMotsepe Championship, yehlukaniswe ngamaphuzu amathathu nezimbangi zayo iPolokwane City neSpurs. Ngenkathi ezikaShaun Bartlett zibhuquzisa iStars eKapa, ibingazibekile phansi iPolokwane ngawo uLwesihlanu ntambama ngoba ivulele isibhaxu sika 2-1 kwiNB La Masia, eTsakane Stadium, eGoli. Ukunqoba kwePolokwane kusho ukubuyela kwayo esicongweni se-log ngenxa yomehluko wamagoli phakathi kwayo nezimbangi zayo iSpurs esendaweni yesibili neStars esendaweni yesithathu, yize womathathu amaqembu ebambene ngamaphuzu…

OWAYEYINSIKA kwiBlack Leopards neMamelodi Sundowns uTiyani Mabunda ukholwa wukuthi iMarumo Gallants isenethuba lokugwema okwehlela omkhaya bayo iBlack Leopards ngesizini ka-2012/2013 begawulwa yizembe kwiPremiership emuva kokuhamba ibanga kwiCaf Confederation Cup. UMabunda wayeseqenjini leBlack Leopards elaphuma emzuliswaneni weLast 16 weConfederation Cup ngo-2013, okwaba nomthelela ekukhathaleni kwabadlali ngenxa yokugxila emidlalweni yeCaf egqilazayo, yagawulwa yizembe. IGallants isivele ihambe ibanga elide kuneLeopards kulo mqhudelwano njengoba seyedlulele kuma-quarterfinal eConfederation Cup, kulandela ukuqeda kwayo iphezulu kwiGroup A yeConfederation Cup. IGallants izotholana phezulu neChippa United koweDStv Premiership, ePeter Mokaba Stadium ePolokwane, ngoLwesithathu ngo-7.30 ebusuku. Inselelo ebhekene neMarumo ifana ncamashi naleyo eyayibhekene neLeopards ngesizini ka-2012/13. “Ukudlala emqhudelwaneni weCaf kudinga isikwati esibanzi nesiqinile esizobhekana nemidlalo yeCaf, eyePremiership nemiqhudelwano yasekhaya yomkhumulajezi, kuyabagqilaza abadlali ukwehla benyuka kwiCaf. Yiyona yinto eyashaya iLeopards. “Phezu kokufinyelela kwayo kwiLast 16, kodwa ukungabi naso isikwati esibanzi, okunezezelwe…

ISIHLOKO: The Underrated King UMCULI: Heavy K UHLOBO: Ama-piano ne-house music UMHLAZIYI: CHARLES KHUZWAYO UMKHULULI "Heavy K" Siqula ngomunye woDJ bakuleli abake bashisa izikhotha. Le nsizwa edabuka eGqeberha, e-Eastern Cape ike yavelela ngenoni elalithi Beautiful War, Inde, Sweetie nelithi Easy To Love. Sithe sisajabulela umculo wakhe, wavele wanyamalala uHeavy K njengoba esekhuza ibuya ngaleli cwecwe elifinyeziwe, oluwuhlobo lwe-Extended Play (EP) elithi The Underrated King. Engikuphawulile wukuthi kulokhu ubuye ngesigqi sama-piano. Ubophele uYallunder noJNR SA engomeni ethi Ekhaya, uMashudu kwethi Bambezela, u-Aymos, Caiiro noNdoni kwethi Jabula, uBailey noJNR kwethi Dakiwe, uProfessor noMeez kwethi AmaMiliyoni, uStonebwoy kwethi Hold On noNdoni kwethi Phakeme. Okunye engikuqaphelile ukuthi uma isaqala le ngoma ethi Ekhaya, kuba sengathi uzozwa iphimbo likaBucie lithi Easy To Love. Ngale-EP, uHeavy K ukhombisile ukuthi kungani ezibiza ngengonyama ebukeleka phansi. Nakuba ebesezwa…

UQWEQWE lomlingisi yemidlalo yeshashalazi, uJohn Kani, luletha intandokazi yomdlalo wayo weshashalazi iKunene and the King, e-SA State Theatre eqala ngoLwesine iphele ngoMeyi 7. IKunene and the King, eqokwe eminxeni eyisikhombisa kumaNaledi Theatre Awards azoba ngoMeyi 22, eJoburg Theatre isemjikelezweni oqale nyakenye wokukhonjiswa zonke izindawo. UThakgatso Setseta we-SA State Theatre, uthe abantu bazobhema bakholwe ngalo mdlalo obhalwe uyena uJohn Kani njengoba uhlonishwa ezingeni lomhlaba. Phambili kudlala uJohn Kani noMichael Richard. “Umdlalo iKunene And The King uqale ukukhonjiswa kwiRoyal Shakespeare Company eStratford Upon the Avon e-UK ngoMashi 2019. Usuke lapho wadlulela eWest End, eLondon, ukhonjiswa e-Ambassadors Theatre,” kusho uThakgatso. Umdlalo ukhuluma ngeminyaka engu-25 kwabusa uhulumeni wentando yeningi. UKani uthe kuyena kuyisipho esibalulekile njengombhali. Uthe umdlalo wawubhala ngenhloso yokuthi aveze imibuzo anayo ngokwenzeka ezweni. Uveze ukuthi kuyamjabulisa ukuthi aphinde awulethe eNingizimu…

UFunda Magic Mpungose (28) waseMandaba, eNkandla, ukhiphe ulozolo lomucu ngenhloso yokwethulela uMampintsha isigqoko. UMfundas Musiq okuyigama adume ngalo uthi, ukudlula kukaMampintsha emhlabeni kwamphatha kabi ngoba wayenesifiso sokwenza ingoma naye. UMfundas Musiq ubeke kanje: "UMampintsha umculi engikhule ngibukela kuye futhi nginesifiso sokufana naye. Yingakho ngashaqeka ngesikhathi ngizwa izindaba zokushona kwakhe ngoDisemba. Ekuqaleni kwalo nyaka ngibe sengenza ingoma ngaye yize ngingakaze ngikhulume naye." UMfundas Musiq uthe umucu othi Mampintsha, uzowuthula ngokusemthethweni ekupheleni kwenyanga. Lo mculi ohlobene nesihlabani sikamaskandi uKhuzani Mpungose, uthe useneminyaka eyibambile kwezomculo kodwa ugxile kuyo emuva kokuphothula uGrade 12, eSenzela Secondary. Ngonyaka odlule uqokwe kumaGama Awards nakumaLive Your Dreams Awards. "Ngiqale ngo-2010 ukuzama endimeni yomculo, kwathi ngo-2016 ngaya eThekwini, lapho ngahlangane khona nomdansi wase-Afrotainment, (uSgaqa). Ngamchazela ukuthi ngiwumculi kodwa ngishoda ngokuqopha umculo wami, ngakho ngifisa angiphushele wona ukuze usabalale…

KUPHOQELEKE ukuthi umshayeli webhanoyi eNingizimu Afrika, alehlise emva kokuzwa into ebandayo imhamba esithweni ngemuva kokulisusa. Uma ebheka ngaphansi kwesitulo ukubona ukuthi yini le emhambayo, uzithele phezu koholokoqo lwemfezi ebizwa ngeCape Cobra, kwesinye ebuye ibizwe ngeYellow Cobra. Lolu hlobo lwenyoka lungolunye lwezinyoka zase-Afrika eziyingozi. Uma ike yakuluma kuphela imizuzu engu-30 usukwagoqanyawo. "Kubande amathumbu kwathula kwathi cwaka," kusho umshayeli u-Erasmus. Njengoba le nyoka ibisizithandele emlenzeni kuyena kuphoqeleke ukuthi ehlise umoya bese enze isiqiniseko sokuthi wehlisa ibhanoyi ukuze athole usizo. Ngenxa yokuthi bese lisukile ibhanoyi kuphoqeleke ukuthi azame ukulehlisa eWelkom emva kwemizuzu engu-15 lisukile. Emva kwemizuzwana abezimo eziphuthumayo bakwazile ukufika ngokushesha ukuzoyibamba le nyoka. Okushaqisile wukuthi bathe sebesondele bethi bayayibamba bathola ukuthi akukho nyoka futhi engekho oyibonile iphuma ebhanoyini. Obamba izinyoka uJohan de Klerk neqembu lakhe kuphele izinsuku ezimbili beyithungatha bagcina bengayitholanga kodwa…

KUSINDA kwehlela ezweni. Kunezinselelo ezikhungethe izwe futhi osekwenziwe imizamo eminingi ukuthi zisonjululwe kepha azixazululeki. Kuyacaca ukuthi zidinga umthandazo. Hleze kungaba nomehluko uma kukhulekwa ikakhulu njengoba kuyiPhasika. Impelasonto yePhasika eqale ngoLwesihlanu, lapho izinkumbi zabantu bezidumisa uSomandla ezindaweni ezihlukene, iyasongwa namhlanje. Umlando uveza ukuthi iPhasika liqale ukugujwa eminyakeni ecela kwengu-2000 edlule. Ukugujwa kwalo kusukela ekutheni uJesu wabethelwa esiphambanweni wabulawa kodwa wavuka ngosuku lwesithathu. Okukhomba ukunqotshwa kokufa. Kubikwa ukuthi wabethelwa kungoLwesihlanu, wavuka ngeSonto. Umlando uthi uJesu wadayiswa ngomunye wabafundi bakhe ababesondelene naye futhi ebethemba. Nakuba kunjalo akhona amabandla amakhulu aziwayo angayingeni indaba yokugubha iPhasika ngenxa yezizathu zawo ezehlukene. Amabandla anjengamaNazaretha, oFakazi bakaJehova, namaSulumane awahambisani nePhasika. Ngesikhathi sePhasika, basuke beqhubeka nezinhlelo zabo ezejwayelekile. IPhasika liyinto enkulu kwabenkolo yobuKrestu abakholwa wukuthi uJesu wafa, wavuka wanqoba ithuna kwase kusindiswa abantu ababegajwe yizono. Abagubha iPhasika bashiya konke…

USONDONZIMA emdlalweni wokuxhimfa nokukhahlela owaziwa (mixed martial arts), uKhulekani “Cold Steel” Hlongwa, uthi uzimisele ngokuvuka azithathe ngempi emqoka emuva kokubhinjelwa yizinto ngo-2022. UHlongwa (38), uzodudulana noJohannes “JC” Lamprecht, ngoLwesine empini yesicoco selight-heavyweight ngaphansi kwe-Extreme Fighting Championship (EFC). Impi iyingxenye yochungechunge lwezimpi ezizoba e-EFC Perfomance Institute, eSandton, eGoli. Yimpi yokuqala kaHlongwa nonyaka selokhu ebuyele esisindweni sakhe se-heavyweight, njengoba nyakenye ehlulwe kwaze kwaba kabili eguqiswa nguDiego Bandu noStefan Pretorius esisindweni se-middleweight. “Ibaluleke kakhulu le mpi kimi ngoba ukuyinqoba kungase kungibeke ethubeni lokuthi ngiyolwa eDubai. “Kanti-ke okungenza ngibe magange kakhulu ngayo wukuthi ngizobe ngilwa esisindweni sami engisejwayele se-heavyweight ngoba kungithwalise kanzima ukulwa kwi-middleweight. “Ngishaywe ezimpini ezimbili zilandelana kwi-middleweight ngenxa yokuthi bekufanele ngehlise isisindo ngidle ngendlela ehlukile. Lokho bekwenza ngibe ntekenteke ngenxa yokungadli nokungajimi ngendlela engiyejwayele,” kuchaza uHlongwa waseBhamshela, eThekwini. “Ngizilungiselele ngokuphelele ukuyobhekana nale…

UMQEQESHI waMaZulu FC osabambile, u-Ayanda Dlamini, uthi abadlali bakhe bayasiqonda isimo iqembu elibhekene naso njengamanje futhi bayakwazi okulindeleke kubo enkundleni. UDlamini osanda kuthatha izintambo zokuqeqesha kuRomain “Fohloza” Folz, uzobe ehlezi okokuqala ebhentshini njengenhloko yomqeqeshi emdlalweni omqoka AmaZulu azowudlala neCape Town City, eCape Town Stadium, eKapa, namuhla ngo-5.30 ntambama. AmaZulu eza kulo mdlalo nje, azikhotha amanxeba njengoba eseshaywe imidlalo emibili yeligi ilandelana, eshaywa yiStellenbosh FC ngo 2-0, neSwallows FC ngo 1-0, nosekuwabeke endaweni engeyinhle kwi-log yePremiership. ICity eqeqeshwa ngu-Eric Tinkler iza kulo mdlalo isefomini enhle njengoba emidlalweni emine ngaphambi kowanamuhla, inqobe emibili yadlala ngokulingana kwemibili, okubalwa nokukhipha inkani iMamelodi Sundowns ngoLwesibili ibambana nayo ngo 0-0. “Siyazi ukuthi sizobhekana nomdlalo onzima wasekuhambeni eKapa, okuhlale kungelula neze ukudlala khona, kodwa abadlali bami basesimeni esihle ngokomoya nangokomqondo ukubhekana neCape Town City. Bayasiqonda (abadlali) isimo…

ISIQONGQWANE sasemuva kwiRoyal AM, uThabo Matlaba, sithi ukushaywa imidlalo emibili ilandelana akuyona into efiswa yinoma yiliphi iqembu kulesi sikhathi sesizini. Umdlali uthi yingakho bezimisele ngokulwela ukufa nokuphila, ukugwema ukulahla amanye amaphuzu emdlalweni wabo neStellenbosch FC. IRoyal AM ebuya esibhaxwini sika 3-1 esithole kwiMarumo Gallants ngoLwesithathu, namuhla ngo-3 ntambama inenselelo yokuvuka izithathe ngokubhekana neStellenbosch FC emdlalweni weDStv Premiership, eChatsworth Stadium, eThekwini. I-AM ebisiqala ukuthola umgqigqo ngaphansi komqeqeshi wayo osanda kukhuza ibuya uJohn Maduka. Ishaywa yiGallants nje, ibibuya kwesinye isibhaxu sika 5-1 esithole kwiMamelodi Sundowns, ngaphambi kwekhefu leFifa. “Ukushaywa kwethu yiMarumo (ngoLwesithathu) kuwubufakazi bokuthi ebholeni akuyi ngokuthi niphezulu kangakanani ngomdlalo kuneqembu enisuke nibhekene nalo. Kodwa ekugcineni uma nihluleka ukusebenzisa amathuba futhi nenza namaphutha emuva, yinina enigcina ngokushaywa njengoba kwenzeke kithina. “Ngakho sinenselelo enkulu yokuthi singaphindi amaphutha afanayo kulo mdlalo esiyowudlala neStellenbosch, phambi…